Um lúðrasveitirnar

Lúðrasveit Stykkishólms var stofnuð á sumardaginn fyrsta árið 1944. Fyrsti stjórnandi hennar var Víkingur Jóhannsson. Víkingur gerði meira en að stjórna lúðrasveitinni, hann kenndi flestum hljóðfærin líka, því í upphafi kunnu fáir að spila.

Þegar lúðrasveitin var búin að starfa í 20 ár stóðu félagar hennar að því að stofnaður var í bænum tónlistarskóli, Tónlistarskóli Stykkishólms. Það var árið 1964. Hann er því meðal elstu tónlistarskóla landsins. Í sveitinni voru í upphafi eingöngu fullorðnir hljóðfæraleikarar, en með tímanum fóru að koma unglingar inn í sveitina og smám saman þróaðist sveitin í það að verða skólalúðrasveit Tónlistarskóla Stykkishólms.
Í dag starfar lúðasveitin í nokkrum deildum;

Litla Lúðró

Byrjendasveitin er kölluð „Litla Lúðró“. Í henni eru þeir sem eru nýbyrjaðir á hljóðfærin sín, oftast nemendur úr 2.og  3. bekk. Stjórnandi er Anastasia Kiakhidi.

Gemlingasveitin

Í Gemlingasveitinni eru hljóðfæraleikarar sem eru komnir vel á veg í sínu hljóðfæranámi, oftast úr 4. og 5. bekk. Stjórnandi er Anastasia Kiakhidi.

Stóra Lúðró

„Stóru Lúðró“ er stærsta lúðrasveit skólans. Nemendur eru frá 5. bekk og upp í framhaldsskóla. Stjórnandi er Martin Markvoll. 

Víkingasveitin

Lengra komnir nemendur skólans æfa saman í Víkingasveit, sem nefnd er eftir stofnanda lúðrasveitarinnar, Víkingi Jóhannssyni. Samsetning hennar er mismunandi eftir árum og oft er fullorðnum hljóðfæraleikurum bæjarins boðið að spila með. Stjórnandi er Martin Markvoll.